Bashkëpunimi Gjermani-Shqipëri – Ahmetaj: Më shumë hapësira për investitorët gjermanë në Shqipëri
Ministri i Finacave dhe Ekonomisë Arben Ahmetaj ka përshëndetur 30-vjetorin e marrëdhënieve mes Gjermanisë dhe Shqipërisë. Gjatë fjalës së tij në aktivitetin që celebroi këtë përvjetor, ministri theksoi si sfidë të qeverisë rritjen e investimet e huaja duke shtuar se ka ende hapësira për investitorët gjermanë.
“Gjermania është një nga partnerët kryesorë tregtarë të Shqipërisë midis vendeve anëtare të Bashkimit Europian me një volum shkëmbimesh në masën 464 milionë euro në vitin 2017. Janë mbi 190 kompani gjermane prezente në ekonominë shqiptare. Një sfidë e kemi kur vjen fjala për te investimet e huaja. Stoku i investimeve të huaja gjermane në Shqipëri në fund të vitit 2017 është vetëm 116 milionë euro, pra kemi një hapësirë të pafundme për të zgjeruar investimet gjermane. Është përgjegjësi e qeverisë shqiptare, e jona, për të bërë të mundur që vendi të jetë dhe sektorët të jenë atraktivë për kompanitë gjermane”, tha Ahmetaj.
E pranishme, ambasadorja e Gjermanisë Susanne Schutz konfirmoi mbështetjen edhe në të ardhmen për të kontribuuar në zhvillimin e sektorëve të ndryshëm të vendit.
“Gjermania ka investuar me miliona euro nëpërmjet KFV DHE Giz për zhvillimin e projekteve të ndryshme si në atë energjetik, bujqësi, arsim, mjedis etj. Ka ende shumë sfida përpara dhe ka ende shumë projekte. Në do vijojmë t’ju mbështesim në rrugën drejt zhvillimit”, u shpreh Schutz.
Mbështetja e Gjermanisë ndaj vendit tonë në 30 vite kap vlerën prej 1 miliardë euro financime direkte dhe indirekte. 200 milion euro financime vetëm gjatë viteve 2016 dhe 2017 si mbështetje për programet zhvillimore dhe 464 milion euro shkëmbime tregtare vetëm gjatë vitit të kaluar.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.