Bashkëpunimi me Kinën – Krerët e shtetit presin Zv/Kryeministrin e Parë, Zhang Gaoli
Rritja e bashkëpunimit dhe e marrëdhënieve tregtare me Kinën gjatë viteve të fundit ka bërë që vendin tonë ta vizitojnë edhe përfaqësues të lartë të këtij vendi. Presidenti i Republikës, Bujar Nishani, gjatë një takimi me Zëvendëskryeministrin e Parë të Kinës, Zhang Gaoli shprehu optimizmin për nxitje të mëtejshme të bashkëpunimit në të gjitha fushat, si ato institucionale e politike, ashtu edhe ato ekonomike e kulturore. Kreu i Shtetit vlerësoi se në dekadën e fundit këto marrëdhënie kanë hyrë në një fazë të re dhe bashkëpunimi ekonomik po zgjerohet në kushtet e reja të zhvillimeve rajonale e globale.
Por delegacioni i lartë kinez është pritur edhe nga Kryeministri Edi Rama ku është diskutuar mbi klimën pozitive që po shndërrohet në gjenerator të nxitjes së më shumë bashkëpunimeve ekonomike dhe investimeve kineze në Shqipëri. Pala kineze theksoi se pozicioni i Shqipërisë në rajon është strategjik dhe se e shohin të nevojshme rritjen e mekanizmave të bashkëpunimit ekonomik për të nxitur investimet private. Aktualisht, Kina ka disa iniciativa bashkëpunimi në rajon, ku Shqipëria është pjesë, si platforma CEEC 16+1 apo “Një brez, një rrugë”.
Kryeministri Rama, duke evidentuar faktin se Kina aktualisht ka investimet më të mëdha në Shqipëri, theksoi se presim që këto investime të jenë pikë referimi për të mirëpritur investime të tjera. Palët vendosën se duhet intensifikuar puna e Komisionit Ekonomiko-Tregtar, një nismë e dy vendeve që shqyrton potencialet e mundësitë për bashkëpunim. Në takim u dakordësua që ministrat e linjës të shkëmbejnë listat e projekteve strategjike në Shqipëri, për të parë hapësirat ku mund të zgjerohet bashkëpunimi.
Prej dy ditësh në vendin tonë po zhvillon vizitë zyrtare një delegacion prej 50 vetash, në cilin ka 5 Ministra dhe zëvendësministra. Një rëndësi të veçantë kjo vizitë paraqet edhe për faktin se shpresohet që ti hapë rrugë mundësive të reja për bashkëpunime në projekte konkrete mes Shqipërisë dhe Kinës në kuadër të dy programeve mjaft të mëdha të iniciuara nga Kina siç janë nisma “Një brez, një rrugë” dhe mekanizimi i Bashkëpunimit 16+1. Kina me 16 vende të Europës lindore dhe juglindore dhe nisma “Një brez, Një rrugë”, që është rigjallërimi i rrugës së dikurshme të mëndafshit, ku Shqipëria është pjesë e kësaj rruge. Pritet të përfitojë kryesisht në investimet në infrastrukturë”.
Në vitin 2016, me anë të shkëmbimeve dhe bashkëpunimeve në të gjitha nivelet, janë nënshkruar 8 marrëveshje dypalëshe, që mbulon fushën e diplomacisë, kulturës, të burimeve ujore, të burimeve njerëzore dhe ekonomiko-teknike; vëllimi i përgjithshëm i tregtisë dypalëshe arriti në 334 milionë dollarë, duke shënuar një rritje prej 9.8% në krahasim me vitin 2015; kryerja e blerjes së aeroportit ndërkombëtar të Tiranës dhe kompanisë së naftës “Bankers Petroleum” nga kompanitë kineze, shndërron Kinën në një prej partnerëve më të rëndësishme tregtarë dhe një prej investitorëve kryesorë për Shqipërinë.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.