Bashkëpunimi në turizëm, Klosi: Shqipëria dhe Kosova me ofertë të përbashkët turistike
Shqipëria dhe Kosova do të kenë ofertë të përbashkët turistike. Ministri i Turizmit dhe Mjedisit Blendi Klosi dhe ministri i Tregtisë dhe Industrisë së Kosovës. Bajram Hasani u dakordësuan për një bashkëpunim më të gjerë në këtë sektor.
Në takimin e mbajtur në Prizren, Klosi tha se palët do të punojnë në ndërtimin e një strategjie në mes dy vendeve për të realizuar një ofertë të përbashkët përfshirë edhe vendet e Ballkanit.
“Ajo që na del detyrë është që ne të kemi mundësinë që të bëjmë një program të përbashkët ndërmjet 2 institucioneve tona që politikat administrative ta ndjekin me korrektesë atë çfarë biznesi privat dhe shoqëria civile ka realizuar. Prandaj një grup i përbashkët do të kenë mundësi që deri në tetor të përgatisin një agjendë të përbashkët që t’ia paraqesim tur operatorëve në një takim të përbashkët për ta parë jo vetëm dy anët e bjeshkës si një të tërë por të kemi një mundësi që në të gjithë rajonin e Ballkanit të kemi oferta të përbashkëta”, tha Klosi.
Në këtë kuadër ministri Hasani tha se pritet që në fillim të vjeshtës në Brezovicë, apo Rugovë të bëhet hapja e sezonit turistik, për tërheqjen e sa më të madhe të turistëve nga vendi dhe rajoni.
“Ne jemi për bashkëpunim sidomos me shtetin shqiptar, sepse ka mundësi për fushën e bashkëpunimit edhe sa i përket turizmit. Biseduam që në fillim të sezonit së vjeshtës në Brezovicë, apo Rugovë të bëjmë hapjen e sezonit turistik dhe t’i japim një mesazh dhe t’i ftojmë të gjithë turistët të na vizitojnë dhe se ka shumë vend për të na vizituar edhe turistët nga shteti shqiptar”- u shpreh tha ministri Hasani.
Në takimin e tyre ministrat ndanë edhe zhvillimet më të fundit të sezonit turistik në Shqipëri Ministri Blendi Klosi u shpreh se është rritur me 17 për qind numri i turistëve këtë korrik krahasuar me vitin paraardhës, ku rritje ka patur edhe numri i pushuesve nga Kosova.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.