“Bashkëqeverisje me ty për Shqipërinë që duam” , Rama: Mirëpresim kritikat dhe sugjerimet për organizimin e platformës së re
Kryeministri Rama përmes një postimi në rrjetin social “Facebook” ka ftuar ndjekësit e tij që t’i bashkohen platformës “Bashkëqeverisje me ty për Shqipërinë që duam”.
Kreu i kabinetit qeveritar në këtë postim ka një ftesë për kritika e sugjerime, për organizimin e kësaj platforme, ku ndër të tjera shkruan:
“ MIRËMËNGJES dhe me këtë draft të parë të Platformës së Bashkëqeverisjes ME TY PËR SHQIPËRINË QË DUAM, ku mirëpresim kritikat e sugjerimet tuaja për organizimin e platformës, ju uroj një javë të mbarë!”, shkruan Rama.
MIRËMËNGJES 😀dhe me këtë draft të parë të Platformës së Bashkëqeverisjes ME TY PËR SHQIPËRINË QË DUAM, ku mirëpresim…
Posted by Edi Rama on Sunday, July 9, 2017
“Shqipëria që duam” është një platformë e hapur komunikimi e ndërveprimi me qytetarët, që do të shërbejë për t’ju dëgjuar në kohë reale për çështje të aktualitetit politik e qeverisës; për të diskutuar me ju reforma e masa të rëndësishme dhe për të mundësuar ndikimin tuaj mbi politikat qeverisëse në çdo sektor e mbi punën e çdo ministrie apo institucioni të varësisë; për të luftuar së bashku korrupsionin. Shqipëria që duam është mbi të majtën e mbi të djathtën. Shteti që duam është i qytetarëve, jo i pushtetarëve. Sfidat e Shqipërisë sot, nuk janë sfida socialiste apo sfida demokrate, por janë sfida shqiptare. Të vetëdijshëm për barrën e madhe të përgjegjësisë që na u besua, qeveria e re do të bashkëqeverisë me njerëzit e zakonshëm të këtij vendi në një përpjekje shqiptare, të përbashkët, për ta bërë Shqipërinë më të mirë”, thuhet në shpjegimin që jepet për platformën e re.
Ky është një tjetër postim që kryeministri bën, pas ftesës së bërë ditë më parë për personat që janë shkolluar brenda e jashtë vendit e që duan t’i bashkohet projektit të qeverisë në këtë mandat të ri, për të bërë shtet me punë e mirëqenie.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.