Bashkia shpall gjendjen e emergjencës – 20% e Tiranës pa ujë, Task-Forca në terren kundër abuzimeve
Bashkia e Tiranës shpall gjendjen e emergjencës për ujin e pijshëm, si pasojë e uljes së nivelit në rezervuare nga temperaturat e larta. Kryebashkiaku, Erion Veliaj thirri mbledhjen e Task-Forcës për emergjencën natyrore, duke paralajmëruar kontrolle të përditshme për shmangien abuzimeve me ujin e pijshëm, duke filluar që nga pikat e lavazheve.
Kreu i bashkisë u shpreh se ky institucion ka vënë në dispozicion 25 bote me ujë, për furnizimin e zonave ku situata është emergjente, si në Unazën e Re dhe në pjesën perëndimore të Tiranës.
Veliaj shtoi se kriza e ujit prek aktualisht 15%-20% kryeqytetit. Nga kontrollet e bëra, sipas kreut të bashkisë, janë konstatuar vjedhje të ujit të pijshëm me anë të mbi 200 prerjeve të tubacioneve, 29 prej të cilave në vijën e transmetimit. Veliaj i bëri thirrje qytetarëve të denoncojnë rastet e abuzimeve, në numrat e emergjencës 112 dhe 128.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.