Bashkim ujësjellësve “të dobët” – Peleshi: ERRU të nxitë agregimin. Shani: Përgjegjës, politikat qendrore
Komisioni parlamentar i Veprimtarive Prodhuese ka kërkuar nga Enti Rregullator i Ujit të përdorë instrumente që orientojnë bashkimin e ujësjellësve të vegjël, që performojnë negativisht me ujësjellës të mëdhenj, që janë të shëndoshë nga pikëpamja financiare”. Gjatë shqyrtimit të Raportit Vjetor të ERRU-së, kreu i komisionit Niko Peleshi solli rastin e Ujësjellësit të Bashkisë Pustec, që është një prej kompanive me performancë të dobët.
Sipas kreut të ERRU-së, Ndriçim Shani agregimi duhet bërë në baza vullnetare, ndërsa bëri përgjegjës politikat qendrore, por sipas Peleshit pengesa e vetme është kosto elektorale, për shkak të reduktimit të vendeve t punës në rast të bashkimit të ujësjellësve.
Ndërmarrjet e ujësjellës-kanalizimeve përdoren shpesh nga partitë politike për punësime përgjatë viteve elektorale. Ndërkohë që ky fenomen u regjistrua edhe përgjatë vitit 2019, ku sipas raportit të Entit Rregullator të Ujit stafi i shoqërive UK u rrit me 254 punonjës, ndonëse organikat janë tejet të fryra dhe reforma në sektorin e ujit kërkon reduktim të numrit të punonjësve. Ndërkaq, sektori i furnizimit me ujë dhe kanalizme u përkeqësua gjatë 2019-ës, në raport me vitin 2018. Sipas ERRU-së treguesi kryesor që ka ndikuar në këtë situatë është mbulimi i kostove të operimit dhe mirëmbajtjes që ranë 108.3% nga 119% që ishte një vit më parë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.