Bashkimi i AstraZeneca me Sputnik V – Rusia miraton provat klinike. “Mund të rrisë efektshmërinë ndaj varianteve”
Rusia i ka dhënë dritën e gjelbër provave klinike të bashkimit të dozës së AstraZeneca, me vaksinën ruse të Sputnik V, sipas rregullatorëve shtetërorë. Komisioni Etik i Ministrisë së Shëndetësisë, kishte pezulluar në Maj procesin e miratimit për provat klinike , duke kërkuar më shumë informacion. Sipas regjistrit shtetëror të barnave, pesë klinika ruse do të zhvillojnë prova që pritet të përfundojnë në Mars 2022.
Të dy vaksinat, AstraZeneca dhe Sputnik, përfshijnë 2 doza, një fillestare, ndjekur nga një tjetër nxitëse. Megjithatë, Sputnik përdor vektorë të ndryshëm viralë për të dy dozat. Fondi i Investimeve Direkte në Rusi, që promovon përdorimin e vaksinës Sputnik V, ka mirëpritur vendimin për të vazhduar provat. “Komponenti i parë i Sputnik, i quajtur SputnikLight, mund të përdoret në bashkim me vaksina të tjera për të rritur efektshmërinë e tyre, përfshirë ndaj varianteve të reja”- deklaroi fondi.
Vaksinat me vektorë viralë përdorin versione të modifikuara të virusit si mjete, apo vektor, që bartin informacion genetik që ndihmon trupin të ndërtojë imunitet kundër infeksioneve në të ardhmen. Prova tek njerëzit të bashkimit të vaksinës së AstraZeneca me Sputnik janë miratuar në Azerbaixhan, Emiratet e Bashkuara Arabe, Bjellorusi dhe Argjentinë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.