Bashkitë “harrojnë” taksën e pronës – Dështon formula e re, ende larg zbatimit
61 bashkitë në vend po vijojnë të vërtetojnë se iniciativa e Ministrisë së Financave dhe Ekonomisë për mbledhjen e taksë së pronës me metodologjinë e re, ishte e nxituar, pasi nuk kishte përfunduar ende kadastra fiskale.
Këtë gjë e faktojnë edhe treguesit fiskalë, ku rezulton se taksa mbi ndërtesën në 7 muaj është thuajse në të njëjtat shifra të një vitit më parë, ku në total janë mbledhur rreth 3.5 miliardë lekë.
Ndërsa vetëm gjatë muajit Korrik, vendorët mblodhët 300 milionë lekë, nga 500 milionë që u mblodhën në të njëjtën periudhë të një viti më parë, çka tregon rënie të performancës dhe ecuri negative.
Përpos mosfunksionimit të metodologjisë së re, këtë vit kanë ndikuar edhe zgjedhjet vendore dhe fakti që administrata lokale nuk ka pasur përqendrimin maksimal. Sipas të Dhënave të Shoqatës së Bashkive të Shqipërisë, sistemi në tërësi nuk po funksionon mirë dhe pushteti vendor po vjel këtë taksë me metodat e vjetra.
Ndërsa duket se Ujësjellës Kanalizime Tiranë ka marrë masa duke iu bërë apel qytetarëve që të bëjnë vetëdeklarimet për sipërfaqet banuese, në mënyrë që të kenë të dhëna më të sakta për çdo familje.
Pranë këtij institucioni është ngritur edhe drejtoria e taksës së pronës që do të menaxhojë këtë sektor. Ndërsa formula e re ka hyrë në fuqi që në 1 Prill 2018, duket se zbatimi saj është shumë larg, ndërsa qeveria ka parashikuar rritje të të ardhurave me 50-70 milionë euro në vit.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.