Bashkitë “humbin” të ardhurat mbi pasurinë – 128 mln euro nga taksat, ndërtimet e reja kontribuan më shumë

61 bashkitë në vend mblodhën 15.9 miliardë lekë apo 128 milionë euro nga taksat  vendore gjatë vitit 2019, me një rritje prej 9.1 për qind krahasuar me një vit më parë. Referuar raportit të financave vendore,  pavarësisht se në terma të përgjithshme ecuria është pozitive, vihet re varësia që ka pushteti vendor ndaj një numri të kufizuar taksash.

Kështu, ndërsa në tre vite e fundit, perfomanca e të ardhurave në këtë drejtim është pacaktuar nga  dy elementë: taksa e ndikimit në infrastrukturë nga ndërtimet e reja dhe taksat mbi pasuritë e paluajtshme (ndërtesa, tokë bujqësore, truall) të cilat përbëjnë 85.8 për qind të totalit, duket se taksa mbi pasuritë ka humbur terren pasi ka pësuar rënie, ndërsa të ardhurat nga ndërtimet e reja janë rritur me ritme të përshpejtuara.

Në të kundërt, pesha dhe kontributi i tatimit të thjeshtuar mbi biznesin e vogël dhe i taksave të tjera vijuan tkurrjen përgjatë vitit 2019. Duket se problematikat me lidhur me të drejtat e pronësisë dhe mungesës së regjistrave kadastralë si dhe mosaplikimi nga të gjitha bashkitë i metodologjisë së re, ka bërë që nga taksa e pronës të mblidhen 5.2 miliardë lekë, me rënie të lehtë krahasuar me një vit më parë.  Në rreth 47.5 për qind të bashkive, të ardhurat nga taksat e pronës rezultojnë në rënie.

Në nivel bashkie,  43.5 për qind e të ardhurave nga taksa e pasurisë së paluajtshme mblidhet nga Bashkia Tiranë dhe më pas renditet Durrësi. Ndërsa të ardhurat nga taksa e ndikimit në infrastrukturë nga ndërtimet e reja u regjistruan në 8.4 miliardë lekë apo 1.2 miliardë lekë më shumë se një vit më parë, që duket se tashmë është kontribuuesja kryesore në buxhetet e bashkive.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.