Bashkitë rrisin borxhet – Haxhimali: Gjyqet e të pushuarve nga puna, problem i vazhdueshëm

Pushteti vendor vijon të krijojë detyrime të prapambetura pavarësisht udhëzimeve të qeverisë qendrore për shlyerjen e tyre sipas një grafiku të caktuar.  Referuar raportit të publikuar së fundmi nga COPlan, stoku i detyrimeve të prapambetura i 61 bashkive në vend në shtator 2021 fiksohet në 7.2 miliardë lekë dhe  rezulton të zgjeruar me rreth 3.6% krahasuar me nivelin e shënuar në fund të vitit 2020 dhe me rreth 10.3% krahasuar me nivelin e regjistruar ne fund të 6 mujorin 2021.

Po të krahasojmë shifrat ndër vite, vihet re se më problematiku rezulton viti 2015 me një stok prej 12.1 miliardë lekësh, i cili më pas ka ardhur në rënie progressive deri në vitin 2018. Më pas është regjistruar një rritje e lehtë në 2019-ën për shkak edhe të zgjedhjeve vendore, ku stoku  regjistrohej në 8.2 miliardë lekë, duke u ndjekur nga një tendenca rënëse, deri në fund të shtatorit ku bashkitë sërish kanë hapur projekte pa pasur fonde në dispozicion apo kanë krijuar detyrime gjyqsore, duke bërë që të rrisin vlerën e borxhit ndaj palëve të treta.

Këtë problematikë e pranon edhe vetë Shoqata e Bashkive të Shqipërisë.  Sipas drejtorit ekzekutiv, Agron Haxhimali, shqetësim në këtë pikë janë detyrimet e krijuara  për shkak të të larguarve nga puna. Në stokun e detyrimeve të prapambetura, bashkia Kavajë ka peshën më të madhe me rreth 15.8% të totalit, ndjekur nga bashkitë Tiranë (12.2%), Vorë (9.3%).

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.