Bashkitë rritën investimet – Kamza kryeson listën, arsimi mori fonde të “majme”
Shpenzimet e 61 bashkive në vend për investime, të bëra me buxhetet e veta, kanë shënuar një rritje prej 34.7 për qind në vitin 2019, kundrejt një viti më parë, ku rezultonin në rënie të theksuar. Sipas raportit të financave vendore, në total u investuan 17.6 miliardë lekë apo afro 142 milionë euro. Sipas funksioneve, shpenzimet për çështjet ekonomike, ku përfshihet infrastruktura e transportit dhe ato për strehimin dhe komoditetet e komunitetit, ku përfshihen shpenzimet për strehimin dhe urbanistikën, ujësjellës dhe kanalizime vendore, ndriçim publik, zënë peshën kryesore të shpenzimeve kapitale gjatë vitit që lam pas.
Me transferimin e kompetencave të reja në lidhje me arsimin parashkollor dhe atë parauniversitar, bashkitë kanë rritur edhe nivelin e investimeve në infrastrukturat arsimore. Përkatësisht investimet në arsim në vitin 2019 arritën në një nivel prej 2.4 miliardë lekësh, me rritje 82.6 për qind në terma vjetorë. Ndërsa në funksionin mbrojtja sociale u investuan 94.5 milionë lekë, me rënie rreth 55.8 për qind në terma vjetorë.
Pesha e shpenzimeve kapitale ndaj totalit të shpenzimeve, të kryera me fondet e veta, shënoi nivelin maksimal prej rreth 60.8 për qind në bashkinë Kamëz, ndjekur nga Vau i Dejës me 53.5 për qind, dhe më pas renditen bashkitë Mallakastër, Vorë dhe Tiranë. Ndërsa bashkitë që kanë shpenzuar më pak në këtë drejtim, nën ndikimin edhe të kapacitetit fiskal të ulët janë Kukësi, Poliçani, Dibra, Kolonja, Puka dhe Skrapari, ku përqindja e fondeve të shpenzuara për investime rezulton të jetë nën 10 për qind të fondeve të veta në dispozicion.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.