Bashkitë vuajnë zerimin e rentës minerare – Haxhimali: Qeveria shkel ligjin, nuk ka kompensuar të ardhurat e munguara
Qeveria nuk ka miratuar asnjë fond për të kompensuar të ardhurat e munguara për bashkitë, të cilat preken nga zerimi i taksës së rentës minerare për mineralet metalore, që eksportohen, sikurse është ferrokromi apo koncentratet e kromit dhe të bakrit. Eksperti i qeverisjes vendore, Agron Haxhimali thotë se kjo është në kundërshtim me legjislacionin në fuqi.
Bashkitë përfitojnë 5% të rentës minerare që derdhet në buxhetin e shtetit, por sipas Haxhimalit mungesa e këtij kompensimi ka krijuar një hendek midis planifikimit dhe zbatimit të shërbimeve për bashkitë, që preken nga ndryshimet ligjore të qeverisë.
Ndonëse nuk ka shifra të sakta mbi impaktin që ka patur përjashtimi nga taksa e rentës minerare për mineralet metalore që përpunohen në vend dhe eksportohen, Haxhimali thotë se mungesa e kësaj të ardhure është domethënëse për bashkitë, duke mbajtur parasysh kategorinë e tyre.
Ndryshimet ligjore që hynë në fuqi këtë vit parashikuan përjashtimin nga taksa e rentës minerare për një periudhë 3-vjeçare të mineraleve metalore që përpunohen në vend dhe eksportohen në formën e nënprodukteve minerare. Qëllimi i kësaj mase ishte mbështetja e industrisë së përpunimit të mineraleve metalore, e cila po përjeton një periudhë krize të thellë si pasojë e efekteve të pandemisë COVID-19, që kanë shkaktuar dhe ulje të kërkesës dhe çmimeve të tregut ndërkombëtar të nënprodukteve minerare metalore. Këto dnryshime u kundërshtuan nga presidenti Ilir Meta, duke u konsideruar si klienteliste. Megjithë maxhoranca rrëzoi edhe dekretin e Metës, duke bërë që ato të hyjnë në fuqi.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.