Bastet, letër qeverisë – “Anuloni vendimin, të gatshëm t’u përgjigjemi”
Ndërsa pritet që ditën e Martë të diskutohet në Komisionet Parlamentare projektligji i ri për lojërat e fatit, Shoqëritë e Basteve Sportive, i kanë dërguar një letër institucioneve kryesore hartuese dhe zbatuese të kësaj iniciative, duke i bërë thirrje për të rishikuar vendimin për mbylljen e tyre vitin e ardhshëm. Sipas letrës, këto subjekte shprehin gatishmërinë për të bashkëpunuar me qeverinë, për të ndryshuar disa elemente të aktivitetit të tyre, që të jenë në përputhje me ligjin.
Në letër argumentohet se janë 15 mijë familje që preken nga mbyllja e menjëhershme e aktivitetit të tyre, ndërsa paralajmërojnë se në momentin që s’do të gjejnë zgjidhje, do ta çojnë këtë çështje në Gjykatë.
Në letër thuhet se 3 kompanitë kryesore të basteve, në vijim të përpjekjeve të tyre për të kapërcyer ngërçin e krijuar nga projektligji që synon mbylljen e menjëhershme të aktivitetit të tyre në 31.12.2018, shprehin publikisht gatishmërinë për të bashkëpunuar me institucionet përgjegjëse për të arritur së bashku respektimin e ligjit aktual;
Reduktimin me 50% te numrit te pikave sekondare brenda vitit 2019 dhe një reduktim konstant në vitet pasardhëse; Zbatimin e distancave deri 100 m nga institucionet arsimore dhe fetare; Heqjen e reklamave në Media; Pastrimin e fasadave dhe vetratave të dyqaneve nga elementët e Basteve Sportive; Kontributin për identifikimin dhe trajtimin e personave që kanë varësi nga bixhozi dhe bashkëpunim të ngushtë me AMLF për të eliminuar praninë e tyre fizike në pikat e basteve, etj.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.