Bastet sportive “vetëflijohen” – Mbyllje masive 1 muaj përpara hyrjes në fuqi të ligjit
Nga një vëzhgim i bërë me kamerën e TV SCAN në kryeqytet, vihet re se subjektet që më së shumti janë vënë në lëvizje janë llotot sportive, ndërsa kazinotë vijojnë aktivitetin, për të përfituar edhe nga ditët e fundit që ligji u lejon të funksionojnë.
Shoqata e Basteve Sportive bën me dije se deri më tani në të gjithë vendin janë rreth 4 mijë pika llotosh që janë mbyllur, nga 4300 që janë në total dhe më së shumti pjesa e mbetur funksionon në kryeqytet.
Ndërsa nga ana tjetër këto kompani kanë filluar të nxjerrin në shitje edhe pajisjet, si kompjuterat apo televizorët, si dhe një numër i konsiderueshëm ambientesh janë nxjerrë me qira dhe nuk janë shndërruar në aktivitete të tjera nga përfaqësuesit e kompanive të basteve.
Burime nga tatimet konfirmojnë mbylljen vullnetare të këtyre subjekteve si fizike ashtu edhe të NIPT-eve sekondare, ndërsa theksojnë se deri më tani nuk ka pasur asnjë aksion detyrues.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.