BB: Biznesi paguan më pak taksa – Në Shqipëri rënie e lehtë krahasuar me vjet, por po i “mbysin” procedurat
Raporti më i fundit i të bërit biznes nga Banka Botërore e rendit Shqipërinë në pozita jo fort të mira në shumë drejtime. Një ndër to është edhe pagesa e taksave.
Për një biznes, pagesa e taksave është një kokëçarje më vete, sidomos në Shqipëri. Raporti merr në vlerësim një biznes të mesëm, në harkun e një viti. Atij i duhet të shpenzojë plot 252 orë në vit vetëm për të paguar taksat, po aq sa një vit më parë.
Numri i procedurave vlerësohet në 35 të tilla, po aq sa një vit më parë. Është pikërisht numri i procedurave që i jep një “shuplakë” të rëndë vendit tonë në drejtim të të bërit biznes, pasi ndërkohë që në Shqipëri janë plot 35 procedurat që duhet të ndjekë një biznes vetëm për të paguar, në Europë janë vetëm 14.4, ndërkohë që në vendet e OECD 10.3.
Ajo që ka ndryshuar këtë vit është norma e taksave, dhe të paktën në këtë drejtim, kemi lajme të mira; kanë rënë, nga 37.3% në raportin e kaluar, në 36.6%, sot. Kosto e taksave dhe kontributeve që paguan një biznes llogaritet në raport me fitimin.
Pra, ndërkohë që një biznes në Shqipëri i paguan 36.6% të fitimit, shtetit, në Europën dhe Azinë qendrore kjo normë fiksohet në 31.7%, ndërkohë që mesatarja e OECD fiksohet në 39.8%.
Taksat dhe kontributet më problematike për një biznes, si në drejtim të kohës së shpenzuar e si në drejtim të procedurave, janë: ajo koorporative, me 104 orë, ajo e TVSH me 87 orë, e më pas ajo për kontributet shoqërore, që për më tepër paguhet çdo muaj e përkthehet në 12 procedura në vetëm një vit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.