BB, projekt të ri në rajon – Shqipëria interes për lehtësimin e tregtisë, do na kursejë 1% të PBB në vit
Banka Botërore po përgatit një projekt të përbashkët mes vendeve të rajonit për të lehtësuar tregtinë mes tyre, thotë ekonomisti i institucionit në Beograd. Kalimi i kamionëve nëpër kufijtë e Ballkanit i kushton shteteve rreth 800 milionë euro në vit, ose 1% e PBB mesatarisht, tregojnë të dhënat e Bankës Botërore. Për projektin deri më tani kanë shprehur interes Serbia, Maqedonia dhe Shqipëria.
Kamionët nëpër kufijtë e vendeve të rajonit qëndrojnë në pritje 7 deri në 48 orë, çka përkthehet në 26 milionë orë në vit të humbura, ndërkohë që në vende si Gjeorgjia pritja është vetëm 7 minuta, deklaroi ministri serb i tregtisë, i cili ka folur mbi përfitimet që sjell ky projekt i ri i Bankës Botërore. Ky projekt mendohet t`i paraprijë tregut të përbashkët rajonal, i cili mesa duket do të kërkojë më shumë kohë se çmendohej paraprakisht për t`u bërë realitet.
Dy shtetet që e kërkojnë me ngulm këtë iniciativë janë Shqipëria dhe Serbia. Kryeministri Rama është shprehur vazhdimisht në favor të tregut të përbashkët. Së fundmi edhe presidenti serb, Alexander Vuçiç deklaroi se, nuk do të heqë dorë nga ideja e krijimit të tregut të përbashkët, pasi bazohet mbi argumenta të arsyeshëm ekonomikë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.