BE “bekon” “Dow-Dupont” – Miraton shkrirjen për $77 mld, krijohet një gjigand
Bashkimi Europian i ka dhënë dritën jeshile operacionit të shkrirjes mes DuPont dhe Dow Chemicals. Dy kompanitë do të shkrihen në një të vetme, për një vlerë prej $77 miliardë. Kjo është marrëveshja e parë që merr bekimin e Bashkimit Europian ndër tre të tilla gjithsej.
Dy të tjerat janë; ajo e Bayer për të blerë Monsanto dhe ajo e China national chemical corp dhe Syngenta. Marrëveshja mes Dupont dhe Dow Chemicals pritet t`i japë një dimension krejt tjetër industrisë globale agro-kimike.
Kompanitë janë të specializuara kryesisht në prodhimin e pesticideve. Ujdia mes dy kompanive ishte njoftuar rreth një vit më parë, por shqetësimet në lidhje me rregullatorët e përbashkët bënë që Komisioni Europian të mendohej rreth 1 vit për rregullsinë e marrëveshjes, duke u siguruar që kompania e re mos të merrte pozita monopoliste në treg.
Të dyja kompanitë janë amerikane, por për shkak të shtrirjes së gjerë në çdo cep të globit, nevojitej edhe aprovimi nga Europa.
Dupont është kompania e katërt në botë që operon në sektor në bazë të kapitalizimit në treg, ndërkohë që Dow chemicals mban vendin e tretë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.