BE do të pezullojë tarifat për importet e Ukrainës për një vit!

Komisioni Euopian propozoi të mërkurën një pezullim një vjeçar të detyrimeve të importit për të gjitha mallrat ukrainase që nuk mbulohen nga një marrëveshje ekzistuese e tregtisë së lirë për të ndihmuar ekonominë e vendit gjatë luftës me Rusinë.

Masat do të zbatohen veçanërisht për frutat dhe perimet, që i nënshtrohen kërkesave për çmimin minimal, produktet bujqësore që përballen me kuota dhe disa mallra industriale, tarifat për të cilat duhej të hiqeshin vetëm në fund të vitit 2022.

Ky pezullim, i përcaktuar në marrëveshjen e tregtisë së lirë BE-Ukrainë 2016, zbatohet për plehrat, produktet e aluminit dhe makinat.

Bashkimi Europian do të përjashtojë gjithashtu Ukrainën nga masat mbrojtëse që kufizojnë importet e çelikut dhe heqjen e tarifave anti-dumping që BE vendos aktualisht për tubat e çelikut ukrainas, produktet e rrafshët të çelikut të petëzuara në nxehtësi dhe dërrasat e hekurosjes.

Presidenti ukrainas Volodymyr Zelenskiy tha se kishte diskutuar propozimin me Presidenten e Komisionit Europian Ursula von der Leyen të mërkurën dhe shprehu mirënjohjen e tij. Propozimi tani do të duhet të miratohet nga Parlamenti Europian dhe qeveritë e BE-së për të hyrë në fuqi.

Komisioni Europian, i cili mbikëqyr politikën tregtare në 27 vendet e BE-së, tha se masat e paprecedentë ishin të dizajnuara për të lehtësuar vështirësitë për prodhuesit dhe eksportuesit ukrainas përballë pushtimit të Rusisë.

Vitin e kaluar, tregtia dypalëshe BE-Ukrainë ishte më shumë se 52 miliardë euro (55 miliardë dollarë), dyfishi i nivelit të saj përpara marrëveshjes së tregtisë së lirë të vitit 2016.

Me transportin ukrainas përmes Detit të Zi tashmë të ndërprerë nga marina ruse, BE-ja gjithashtu ka lëvizur për të ndihmuar transportin tokësor të mallrave ukrainas, për shembull duke lehtësuar kushtet e hyrjes për shoferët e kamionëve ukrainas. RTS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.