BE, fond 100 Miliardë Euro – Do të shërbejë për të konkurruar gjigantët e SHBA dhe Kinës

Zyrtarët e Bashkimit Europian kanë hartuar një plan për krijimin e një fondi sovran, që do të shërbejë për të investuar në kompanitë europiane, të cilat do të konkurrojnë me gjigantët amerikanë dhe kinezë të teknologjisë, sipas një raportimi të Financial Times.

Raporti, që citon një dokument të brendshëm, thotë se zyrtarët europianë kanë hartuar një dokument për krijimin e “Fondit Europian të së Ardhmes”, i cili do të investojë rreth 100 miliardë euro tek kompanitë europianë me potencial të lartë.

Ky propozim do të shënojë një hap drastik nga Bashkimi Europian, në përpjekje për të inkurajuar kompanitë brenda kontinentit të konkurrojnë me rivalët nga SHBA dhe Kina.

Sipas Financal Times, dokumenti në mënyrë specifike përmend kërcënime nga kompanitë amerikane si, Google, Apple, Facebook dhe Amazon dhe nga ato kineze si Baidu, Alibaba dhe Tencent. “Europa nuk ka kompani të tilla dhe kjo përbën një rrezik për rritjen ekonomike, punësimin dhe influencën e Europës në sektorët strategjikë”, shkruhet në dokumentin e cituar nga FT.

Por, është ende e paqartë nëse dokumenti do të marrë mbështetjen e vendeve anëtare të Bashkimit Europian. Zëdhënësja e Komisionit Europian, Mina Andreeva, deklaroi të premten se plani nuk është parë ende nga presidentja e zgjedhur e Komisionit, Ursula von der Leyen.

Analistët presin që drejtuesit e rinj të Bashkimit Europian të mbajnë një qëndrim të ashpër ndaj gjigantëve të teknologjisë, kur bëhet fjalë për çështje si privatësia, antitrusti dhe taksimi.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.