BE, “garanci” për bankat – Propozon ngrirje të llogarive në momente të vështira

Bashkimi Europian po vlerëson idenë e ngrirjes së llogarive bankare në momente të vështira. Kjo masë ka për qëllim që të parandalojë arratinë e kapitalit nga bankat në raste të caktuara, e zakonisht kur përhapet panik, thotë një dokument i Brukselit i zbuluar pjesërisht nga Reuters.

Masat drastike kanë për qëllim që të shpëtojnë bankat në vështirësi, pra ato institucione huadhënëse që nuk janë mjaftueshëm të kapitalizuara, e që rrezikojnë të përfshihen në kaos në rast turbullirash.

Kjo lëvizje shihet si një garanci për bankat, por skeptikët argumentojnë se, mund të prodhojë edhe efektin e kundërt, pra të përshpejtojnë procesin e tërheqjes së depozitave, në momentin që përhapen zërat e para për një bankë në vështirësi. Ky draft është në proces përgatitje qysh prej fillimit të këtij viti, dhe vjen më pak se dy muaj pasi depozituesit tërhoqën masivisht paratë e tyre në Banco Popular, duke nxitur kështu kolapsin e huadhënësit spanjoll.

Gjithashtu, ky propozim vjen në kulmin e debatit europian për mënyrën e adresimit të çështjes së huadhënësve në vështirësi.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.