BE-ja këshillon për pilulën Merck – Në vlerësim edhe tableta rivale e Pfizer për trajtimin e të prekurve nga COVID

Rregullatori i barnave i Bashkimit Europian ka këshilluar përdorimin e pilulës Merck COVID-19 për të rriturit dhe filloi një rishikim të një tablete rivale nga Pfizer për të ndihmuar vendet anëtare të vendosin për miratimin e shpejtë përpara çdo miratimi zyrtar në mbarë BE-në.

Në dy deklarata të veçanta, Agjencia Europiane e Barnave (EMA) detajoi përpjekjet për të avancuar përdorimin e opsioneve eksperimentale, por premtuese, pasi infeksionet dhe vdekjet e lidhura me COVID-in po rriten me shpejtësi në rajon dhe po detyrojnë izolime të reja.

EMA tha se tableta e Merck, Lagevrio, e zhvilluar me Ridgeback Biotherapeutics, duhet të jepet herët dhe brenda pesë ditëve nga simptomat e para për të trajtuar të rriturit që nuk kanë nevojë për mbështetje për oksigjen dhe janë në rrezik të përkeqësimit të sëmundjes së tyre. Agjencia u shpreh kundër trajtimit gjatë shtatzënisë dhe për gratë që planifikojnë ose mund të mbeten shtatzënë, ndërsa shtoi se ushqyerja me gji gjithashtu duhet të ndërpritet gjatë periudhës së përdorimit të pilulës, e cila duhet të merret dy herë në ditë për pesë ditë.

EMA tha se po studionte të dhënat e disponueshme për pilulën Pfizer Paxlovid, disa ditë pasi prodhuesi i barnave kërkoi miratimin në SHBA, duke shtuar se një rishikim më gjithëpërfshirës pritej të fillonte përpara çdo miratimi. Agjencia nuk specifikoi se kur do të ishte ai rishikim. EMA muajin e kaluar filloi një vlerësim të pilulës Merck dhe pret ta përfundojë atë deri në fund të vitit.

Pfizer këtë javë aplikoi për autorizimin e përdorimit emergjent në SHBA të tabletës së saj pas të dhënave që treguan se pilula uli mundësinë e shtrimit në spital ose vdekjes me 89% te të rriturit që janë në rrezik të përkeqësimit të sëmundjes së tyre.

Pilula Merck, që u miratua nga Britania në fillim të këtij muaji, ka treguar se i përgjysmon ato mundësi kur jepet në fillim të sëmundjes.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.