BE-ja ngrin asetet e Vladimir Putin në përgjigje të pushtimit të Ukrainës!
Bashkimi Europian ka ngrirë asetet e presidentit rus Vladimir Putin dhe ministrit të Jashtëm Sergei Lavrov në përgjigje të pushtimit të Ukrainës, duke i shtuar të dy emrat në listën e sanksioneve të BE-së. Masa nënkupton që bankat me bazë në BE do të ndalohen të vënë në dispozicion fonde për to, edhe pse kjo do të varet nga shkalla e bashkëpunimit nga subjektet financiare.
Vendimi u konfirmua nga Josep Borrell, shefi i politikës së jashtme të BE, të premten në mbrëmje. Putin është lideri i tretë botëror që sanksionohet personalisht nga BE, pas presidentit bjellorus Alexander Lukashenko dhe presidentit sirian Bashar al-Assad, vuri në dukje Borrell.
Më parë këtë javë, blloku sanksionoi 351 ligjvënës të Dumës dhe anëtarë të rrethit të ngushtë të Putinit. Putin dhe Lavrov, megjithatë, nuk do t’i nënshtrohen një ndalimi të udhëtimit, një sanksion i rregullt që shpesh shoqëron ngrirjen e aseteve, në mënyrë që të mbahen të hapura kanalet diplomatike.
Kufizimet e diplomacisë perëndimore janë ekspozuar gjatë krizës kufitare, tashmë e kthyer në një luftë të plotë, megjithëse presidenti francez Emmanuel Macron foli me Putinin të enjten në mbrëmje. Emrat e Putinit dhe Lavrovit u përjashtuan nga paketa e mëparshme e sanksioneve dhe ishte e paqartë nëse vendimet e fundit, e diskutuar të enjten gjatë një takimi personal të liderëve të BE-së, do të shkonte deri në dënimin e dy fytyrave më të njohura të qeverisë së Rusisë.
Shpejtësia dërrmuese me të cilën po shpaloset sulmi ushtarak ka rritur në mënyrë drastike presionin ndaj vendeve perëndimore për të dalë me ndëshkime më të ashpra dhe më radikale. Paketa fillestare e masave të së enjtes iu kalua më pas ministrave të punëve të jashtme të bllokut për të vënë prekjen e fundit. Ishte gjatë këtyre diskutimeve ministrore që opsioni për ngrirjen e aseteve financiare të Putinit dhe Lavrov u kthye në tryezë si një opsion i mundshëm.
Grupi përfundimtar i sanksioneve u zbulua të premten në mbrëmje pas një takimi të ministrave të punëve të jashtme të BE-së. E gjithë paketa do të hyjë në fuqi pas publikimit të saj në gazetën zyrtare të BE-së. Coveney tha se përjashtimi i Putinit dhe Lavrovit do të “minonte besueshmërinë” e sanksioneve, por ndalimet e shtuara të udhëtimit nuk duhet të vendosen për momentin. Ngrirja e aseteve të Putinit është një lëvizje më shumë simbolike sesa ndëshkuese.
Errësira rreth personalitetit të Putinit shtrihet edhe në pasurinë e tij personale: sipas revistës Fortune, pasuria e presidentit mund të variojë nga 70 miliardë deri në 150 miliardë dollarë. Mbetet të shihet se sa nga kjo pasuri ruhet në territorin e BE-së. Kryediplomati shtoi se një paketë e tretë sanksionesh është në gatishmëri, por shmangu të japë detaje. Borrell konfirmoi se përjashtimi i Rusisë nga SWIFT, sistemi ndërkombëtar i pagesave, nuk ishte në paketën aktuale, por ishte “mundësi për t’u mbajtur për negociatat e ardhshme”.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.