BE, jo i bashkuar mbi dozat e treta – Disa vende kanë nisur administrimin, të tjera po presin vendimin e EMA

Bashkimi Europian po ndërmerr fushata të ndryshme për dozat e treta të vaksinës së Covid-19, përpara se rregullatori i barnave të rajonit të marrë vendimin mbi sigurinë dhe efektshmërinë. Italia, Franca, Gjermania dhe Irlanda, kanë nisur të administrojnë dozat e treta nxitëse dhe Hollanda planifikon ta bëjë së shpejti, por vetëm ndaj personave me sistem imunitar të cënuar. Disa vende të tjera të BE, po presin për miratimin e Agjencisë Europiane të Barnave këtë Javë.

Panorama e copëzuar reflekton qasjet e ndryshme mbi dozat e treta tek një nga rajonet më të pasura në botë.  Kjo vë gjithashtu në dukje mungesën e një konsensusi mes shkencëtarëve mbi nevojën e tyre, ndërkohë që qeveritë po përpiqen të rimëkëmbin ekonomitë, luftojnë variantin Delta dhe shmangin masat e karantinës gjatë Dimrit.  Duke theksuar rreziqet, Qendra për Sëmundjet Infektive e BE, bëri të ditur se mbulimi me vaksina në rajon është ende shumë i ulët dhe ekziston risku i një rritjeje të madhe të rasteve, shtrimeve në spitale dhe vdekjeve në javët e ardhshme.

Vetëm 61% e popullsisë totale janë vaksinuar plotësisht dhe vetëm 3 vende; Malta, Portugalia dhe Islanda, kanë vaksinuar mbi 75% të popullsisë.   Kjo krahasohet me më pak se 25% në Bullgari, një nga vendet që ndodhet më mbrapa në BE.  Megjithatë, përpjekja e bllokut drejt dozave të treta do të nxisë debat mbi përdorimin e vaksinave nga vendet e pasura, ndërkohë që të varfërit po hasin vështirësi në gjetjen e dozave për banorët.  Organizata Botërore e Shëndetësisë i ka bërë thirrje vendeve që të vonojnë dozat e treta deri sa më shumë njerëz në botë të vaksinohen.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.