BE ‘kërcënon’ SHBA – Planifikon 20 mld euro tarifa për mallrat amerikane. Lista publikohet më 17 prill

Pas deklaratës së presidentit amerikan, Donald Trump se Shtetet e Bashkuara do të vendosin tarifa ndaj 11 miliardë dollarë mallra nga Bashkimi Europian, ka ardhur edhe kundërpërgjigja e këtij të fundit.

Të premten, diplomatët e BE kanë deklaruar se Komisioni Europian ka përpiluar një listë për vendosjen e tarifave ndaj 20 miliardë euro mallra importi të SHBA për shkak të konflikteve të vjetra dypalëshe mbi subvencionet ndaj prodhuesve të avionëve.

Organizata Botërore e Tregtisë nuk ka vendosur ende shuma përfundimtare të kundërveprimeve të mundshme në secilin rast.

Lista me produkte që mund ta tarifohet pritet të publikohet nga KE më datë 17 prill dhe më pas do të nisë një proces konsultimi publik, pas të cilit mund të bëhen edhe ‘rregullime’.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.