BE mbështet sipërmarrjet inovatore – Janë financuar mbi 250 sipërmarrje lokale. Perr: Synojmë zgjerimin e programit

Mbi 250 sipërmarrje lokale janë mbështetur financiarisht dhe për ngritje kapacitetesh nga Bashkimi Evropian, përmes Fondit të Inovacionit, që është pjesë e projektit “BE për Innovacionin” e që implementohet nga GIZ dhe Ambasada Suedeze. Shef i Bashkëpunimit në Delegacionin e BE-së në Shqipëri, Hubert Perr shpjegon qëllimin e këtij programi, që ka në qendër inovacionin apo thënë ndryshe çdo ide të re që i shton vlerë biznesit.

Përfituesit tregojnë sesi mbështetja përmes Fondit të Inovacionit ka ndikuar pozitivisht në zgjerimin e sipërmarrjeve në tregje ndërkombëtare, duke rritur ndjeshëm shitjet.

Ndërkaq, duke marrë në konsideratë nevojat e mëdha për mbështetjen e këtyre nismave, që krijojnë vende pune, veçanërisht për gratë dhe të rinjtë, Perr thotë se po merret në konsideratë vazhdimësia e programit.

Tashmë, fjala inovacion nuk përdorët vetëm në domethënien e ngushtë të saj ku përfshihet vetëm fusha e teknologjisë apo bota digjital, por për të përkufizuar një risi, një mendim të ri kreativ ose një zgjidhje më të mirë që përmbush kërkesat e reja apo tashmë ekzistuese të tregut.

Ndërkohë që, në kontekstin e programit të Bashkimit Evropian, inovacioni është çdo ide e re që i shton vlerë biznesit, e bën më eficent ose redukton kostot dhe kohën. Inovacioni mund të jetë një proces i ri, një përqasje e re ndaj marketingut, nje produkt apo shërbim i ri që i përgjigjet sfidave ekzistuese në biznes dhe është funksional në kontekstin vendas.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.