BE nuk mund të mbështetet më tek SHBA për mbrojtje – Tani ajo ka një plan për një forcë të re ushtarake
Kaosi në kufirin midis Polonisë dhe Bjellorusisë është vetëm incidenti më i fundit që ka bërë që drejtuesit e lartë në Bruksel të mendojnë se çfarë duhet të bëjë Bashkimi Europian afatgjatë për sigurinë e tij të brendshme.
Kjo krizë emigrantësh, në të cilën lideri bjellorus Alexander Lukashenko akuzohet për drejtimin e refugjatëve në kufirin polak, ndodhi pasi frika u rrit në Europën Lindore për një grumbullim të trupave ruse në kufirin e Ukrainës.
Krizat e fundit gjeopolitike, veçanërisht tërheqja e çrregullt e trupave nga Afganistani, ka forcuar mendimin se BE-ja nuk mund të mbështetet tërësisht tek Shtetet e Bashkuara ose NATO për mbrojtjen e saj.
Rastësisht, plani fillestar për një plan të tillë iu prezantua vendeve anëtare të BE këtë javë. “Busulla Strategjike për Sigurinë dhe Mbrojtjen” është një përshkrim i qartë se si mund të funksionojë bashkëpunimi në të gjithë bllokun.
Propozimi kryesor është që BE-ja të marrë kapacitetin për të vendosur me shpejtësi deri në 5000 trupa për t’u marrë me kriza të shumta të mundshme. Në vend të një force të përhershme që do t’i raportojë një komandanti në Bruksel, këto grupe të vendosjes së shpejtë do të jenë një koleksion trupash nga të gjithë shtetet anëtare pjesëmarrëse, të formuara për të trajtuar një detyrë specifike dhe të komanduara nga niveli i BE-së në atë mision. Këto detyra mund të variojnë nga një mision evakuimi, si p.sh. në Afganistan, te ruajtja e paqes në kufi ose misione humanitare.
Dokumenti flet gjithashtu për nevojën për një qasje të bashkuar në prokurimin, kërkimin dhe inteligjencën e mbrojtjes, duke e bërë bllokun më konkurrues dhe efikas. Ai pranon se për ta bërë këtë, shpenzimet kombëtare dhe të BE-së duhet të rriten dhe të fokusohen në plotësimin e boshllëqeve që ekzistojnë aktualisht në të gjithë BE-në në tërësi.
Jo të gjitha 27 vendet e BE-së do të kërkohet të marrin pjesë; megjithatë, vendosja e trupave në emër të BE-së do të kërkonte nënshkrimin dhe përfshirjen e shteteve anëtare, dhe detajet se si do të funksiononte kjo ende nuk janë konfirmuar.
Ndërsa ‘tallja’ euroskeptike me idenë e një “ushtrie të BE” do të thotë se ky propozim i fundit është shumë larg nga objektivi i vitit 1999 për deri në 60,000 trupa të gatshme për t’u vendosur në çdo moment, ai është ende ambicioz dhe, në mënyrë të pazakontë për një BE shumëpalëshe nga lart poshtë, propozimi, mbështetet gjerësisht nga të 27 shtetet anëtare.
Megjithatë, këto janë ditët e para dhe arritja e marrëveshjes për çdo gjë të kushtueshme nga 27 vende që përballen me shqetësime shumë të ndryshme sigurie dhe fiskale nuk do të jetë aspak e thjeshtë. CNN
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.