BE përgatitet për Brexit të ashpër. I kërkon Britanisë të braktisë planin që thyen ligjin ndërkombëtar
Bashkimi Europian po përgatitet për t’i dhënë fund në mënyrë të trazuar negociatave 4-vjeçare të Brexit, ndërkohë që zyrtarët e lartë do informojnë 27 anëtarët mbi planin e Boris Johnson për të shkelur traktatin e divorcit. Britania, duke bërë kthesën më të jashtëzakonshme që prej referendumit në Qershor 2016, deklaroi këtë javë se planifikon të thyejë ligjin ndërkombëtar dhe injorojë pjesë të marrëveshjes së divorcit të nënshkruar në Janar.
Lëvizja e Johnson e zhyti Brexit në krizë, në më pak se 4 muaj përpara se vendi të dalë nga orbita e Bashkimit Europian, kur të përfundojë periudha e tranzicionit në Dhjetor. Brukseli urdhëroi Britaninë që të braktisë planin deri në fund të Shtatorit, por vendi ka refuzuar hapur dhe ka bërë të ditur se parlamenti i vetë është sovran përtej ligjit ndërkombëtar. Negociatori kryesor europian, Michel Barnier, tha këtë javë pas bisedimeve në Londër, se blloku po përgatitet për një Brexit pa marrëveshje në fund të këtij viti.
Ndërkohë që bankat e investimeve rritën gjasat e një daljeje të ashpër, paundi ra kundër dollarit dhe euros. Komisioni Europian i kërkoi Britanisë që të braktisë të ashtuquajturin “Ligji i tregut të Brendshëm” deri në fund të Shtatorit, por Britania refuzoi dhe bëri të ditur se parlamenti do ta debatojë planin ditën e Hënë. Megjitahtë, ligji do përballet me kundërshtime në të dy dhomat e paralmentit, ndërkohë që shumë politikanë të lartë britanikë kanë thënë se janë tronditur nga deklarimi kaq i ngathët i Londrës për thyerjen e ligjit ndërkombëtar.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.