BE pranon ‘fajin’/ Von der Leyen: Shumë nuk ishin atje kur Italia kishte më shumë nevojë
Presidentja e Komisionit Europian ka ofruar një “ndjesë të përzemërt” për braktisjen e Italisë në fillim të pandemisë së Koronavirusit.
“Po është e vërtetë që askush nuk ishte me të vërtetë gati për këtë,” tha Ursula von der Leyen para Parlamentit Europian të enjten në mëngjes. “Është gjithashtu e vërtetë që shumë nuk ishin atje në kohën kur Italisë i duhej një ndihmë që në fillim. Dhe po për këtë, është e drejtë që Europa si e tërë të ofrojë një falje të përzemërt.”
Më shumë se 21 mijë njerëz me Koronavirus kanë vdekur në Itali, sipas Universitetit Johns Hopkins – numri më i lartë i vdekjeve në Europë.
Ndërsa Italia u përpoq të kontrollonte shpërthimin në fillim të marsit, Franca dhe Gjermania vendosën kufizime në eksportin e maskave të fytyrës, përkundër paralajmërimeve të Komisionit të BE-së se veprime të tilla mund të minonin përgjigjen kolektive ndaj virusit.(BBC)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.