BE, reagim për zgjedhjet e 25 prillit Borrell dhe Várhelyi: Të mirëorganizuara, keqpërdorim i funksioneve shtetërore nga PS

Përfaqësuesi i Lartë i Politikës së Jashtme, Josep Borrell dhe Komisioneri për Zgjerimin, Olivér Várhelyi i kanë konsideruar si të mirëorganizuara zgjedhjet parlamenetare të 25 prillit, ndërkohë që kanë kërkuar nga numëruesit procedimin me shpejtësi. Përmes një deklarate, bazuar në gjetjet paraprake të OSBE/ODHIR përfaqësuesit e Bashkimit Evropian nuk lenë pa përmendur keqpërdorimin e funksioneve shtetërore nga partia në pushtet si dhe figura të tjera publike.

Sipas gjetjeve dhe konkluzioneve paraprake të Misionit të Vëzhgimit të Kufizuar të Zgjedhjeve të OSBE / ODIHR, zgjedhjet parlamentare ishin përgjithësisht të organizuara mirë nga administrata zgjedhore, ndërsa fushata ishte e gjallë dhe gjithëpërfshirëse. Palët e interesit kishin besim të mjaftueshëm për të marrë pjesë dhe një Komision Qendror i Zgjedhjeve i reformuar (KQZ) mbikëqyri procesin zgjedhor në një mënyrë transparente, duke shijuar besimin e palëve të interesit në të gjitha nivelet. Vëzhguesit raportojnë shqetësime në lidhje me keqpërdorimin e burimeve ose funksioneve shtetërore nga partia në pushtet dhe figura të tjera publike. Ne inkurajojmë të gjitha palët e përfshira në numërim të procedojnë me shpejtësi dhe në përputhje me procedurat e vendosura.

Në deklaratë ata kërkojnë njohjen e rezultatit të zgjedhjeve nga të gjitha palët.

Të gjitha forcat politike tani duhet të sigurojnë funksionimin efektiv dhe demokratik të institucioneve të vendit, si rezultat i këtyre zgjedhjeve. Kjo përfshin përgjegjësinë për të ndjekur parimin demokratik të respektimit të rezultatit të zgjedhjeve. Çdo parregullsi e pretenduar duhet të sillet me vëmendje të Komisionit Qendror të Zgjedhjeve dhe autoriteteve të tjera kompetente, dhe rastet duhet të hetohen siç duhet, përfshirë blerjen e votes”.

Borrell dhe Várhelyi shprehen se BE do të vazhdojë të ndjekë nga afër zhvillimet elektorale deri në çertifikimin përfundimtar të rezultateve, ndërsa shprehën  dëshirën që vendi të hynte në fazën tjetër të procesit të pranimit, me Konferencën e parë Ndërqeveritare për fillimin e negociatave të zhvilloheshin sa më shpejt të ishte e mundur.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.