BE: Rusia synon rezervat e grurit në Ukrainë, duke përkeqësuar krizën globale të ushqimit!
Brukseli ka akuzuar Moskën për përkeqësimin e një krize globale ushqimore duke synuar rezervat e grurit dhe duke parandaluar eksportet nga portet ukrainase. Shefi i politikës së jashtme të BE-së Josep Borrell tha se luftanijet ruse po bllokonin anijet plot me grurë dhe “bombardonin dhe shkatërronin rezervat e grurit dhe po pengonin eksportimin e këtij gruri”.
“Ata po bombardojnë qytetet ukrainase dhe po provokojnë urinë në botë. Ata po provokojnë urinë në botë duke bllokuar eksportet e grurit dhe duke shkatërruar depozitimin e grurit në Ukrainë,” shtoi ai, duke u kërkuar njerëzve të mos fajësojnë sanksionet.
Kryediplomati i bllokut foli pas një takimi të ministrave të punëve të jashtme të BE-së në Luksemburg, ku ata diskutuan përfundimin e mbështetjes së Europës nga nafta dhe gazi si pjesë e paketës së gjashtë të sanksioneve.
Një marrëveshje për sanksione të mëtejshme nuk pritej dhe nuk u arrit, por Borrell tha se “asgjë nuk ishte jashtë tryezës”. “Sot nuk u mor asnjë vendim, vetëm një diskutim”, tha ai. Por ai shtoi se ishte e rëndësishme të fillonte diskutimi i naftës, pasi ishte më e lehtë të zëvendësohej sesa gazi dhe vlen më shumë.
“Vitin e kaluar, 2021, fatura për naftën ishte katër herë më e madhe se ajo e gazit”, u tha Borrell gazetarëve. Edhe pse disa shtete anëtare si Polonia, Balltiku, Irlanda dhe Holanda po bëjnë thirrje për një embargo të energjisë, ai tha se ndikimi i luftës po ka efekte të ndryshme në Evropën Lindore dhe Perëndimore.
“Kjo është një goditje asimetrike për vendet anëtare të BE,” tha ai. “Ajo duhet të menaxhohet me solidaritet dhe unitet.” Borrell tha gjithashtu se mobilizimi i parave nga Fondi Europian i Paqes ishte çelësi për Ukrainën tani dhe përsëriti gatishmërinë e bllokut për të siguruar para për armë vdekjeprurëse dhe mbrojtëse.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.