BE sanksionon rëndë Turqinë për shpimin e brigjeve të Qipros
Bashkimi Europian do të zvogëlojë ndihmën e saj financiare ndaj Turqisë dhe do të ndalojë bisedimet e nivelit të lartë me vendin, si pjesë e një sërë sanksionesh mbi shpimet e naftës dhe gazit në brigjet e Qipros.
Ministrat e jashtëm të BE gjatë takimit në Bruksel të hënën vendosën të ulin ndihmën e para-pranimit për Turqinë për 2020 me 145.8 milionë euro. Ata gjithashtu pezulluan negociatat mbi marrëveshjen e aviacionit dhe ndaluan bisedimet dypalëshe të nivelit të lartë midis dy vendeve.
Së fundi, ata e ftuan Bankën Europiane të Investimeve, institucionin huadhënës jo-fitimprurës të BE-së, të rishikojë aktivitetet e saj të huadhënies në Turqi, të cilat arritën në 358.8 milionë euro vitin e kaluar.
Këshilli edhe një herë i bëri thirrje Turqisë të përmbahet nga aktivitetet e shpimit jashtë brigjeve të Qipros dhe në vend të saj, “të veprojë në frymën e fqinjësisë së mirë dhe të respektojë sovranitetin dhe të drejtat sovrane të Qipros në përputhje me të drejtën ndërkombëtare”.
Në një deklaratë të lëshuar të martën, ministrat e jashtëm të Turqisë thanë se sanksionet e BE “nuk do të ndikojnë në asnjë mënyrë mbi vendosmërinë e Turqisë për të vazhduar aktivitetet e saj të hidrokarbureve në Mesdheun Lindor”. “Këto masa tregojnë se paragjykuese është BE në lidhje me çështjen e Qipros, pasi nuk bën asnjë referencë ndaj qipriotëve turq, të cilët kanë të drejta të barabarta mbi burimet natyrore të ishullit“, thuhej në deklaratë. (Euronews)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.