BE-SHBA, në “paqe” tregtare / Përfundon konflikti më i gjatë tek OBT, për Boeing dhe Airbus
Shefja e komisionit Evropian, Ursula von der Leyen tha se mirëpriti armëpushimin mes Bashkimit Europian dhe Shteteve të Bashkuara, që kanë përfunduar konfliktin më të gjatë ndonjëherë tek Organizata Botërore e Tregtisë. Të dy palët ranë dakord për të hequr tarifat ndaj 11.5 miliardë dollarë mallra, përfshirë verën eruopiane dhe duhanin amerikan. Tarifat u vendosën pas shqetësimeve mbi subvencionet shtetërore tek Beoing në SHBA dhe Airbus në Europë.
Lajmërimi vjen pas një samiti të Bashkimit Europian me Shtetet e Bashkuara, ku merrte pjesë presidenti amerikan , Joe Biden. Përfaqësuesja e tregtisë në SHBA, Katherine Tai, tha se konflikti ka lejuar vende të tjera të zhvillojnë industritë e tyre. Ajo shtoi se marrëveshja e re do mundësojë që të dy palët të diskutojnë se si t’i bëjnë ballë investimeve në avion nga lojtar që nuk respektojnë konkurrencën, duke i’u referuar Kinës. SHBA dhe BE ranë gjithashtu dakord për një grup pune mbi çështjen, të jenë trasnparentë në financimin në Hulumtim dhe Zhvillim, si dhe të shmangin dëmin ndaj palës tjetër. Kjo marrëveshje heq 1 ndër 2 pikat më irrituese të trashëguara nga presidenca e Trump, ku tjetra është tarifa mbi importet e çelikut dhe aluminit.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.