BE, shenja kompromisi për stimujt. Kurz dhe Rutte flasin për progres mbi paketën ndaj Covid-19

Liderët e shteteve veriore të Bashkimit Europian, shfaqën shenjat e para të kompromisit mbi planin prej 1.8 trilionë euro të koronavirusit në nisje të Javës, ndërkohë që negociatat në Bruksel janë zgjatur për 4 ditë me radhë.  Liderët europianë, që reaguan në mënyrë të ngadaltë ndaj koronavirusit, mendojnë se kanë tashmë shansin për ndrequr gabimet, me një plan të ndihmave ekonomike.

Megjithatë,  janë shfaqur konflikte të vjetra mes vendeve më pak të ndikuara dhe vendet me nivel të lartë të borxhit si Italia dhe Greqia.  “Marrëveshja është e domosdoshme”, – tha ministri francez i Financave, Bruno Le Maire, ndërkohë që diplomatët u përgatitën për një tjetër ditë të samitit që mund të jetë më i gjati i Bashkimit Europian. Në nisje të së Hënës, presidenti francez, Emmanuel Macron humbi durimin me “bllokadën” e Hollandës, Suedisë, Danimarkës, Austrisë dhe Finlandës, duke përplasur grushtin në tavolinë, sipas një diplomati. Një tjetër diplomat e konfirmoi shpërthimin, duke thënë se tensionet u rritën deri sa kryeministrja e Belgjikës, Sophie Wilmes, bëri thirrje për qetësi.

Presidenti i Këshillit Europian, Charles Michel, i bëri thirrje të 27 liderëve për të arritur “misionin e pamundur”, duke i rikujtuar ata se më shumë se 600,000 persona kanë vdekur nga koronavirusi në të gjithë botën.  “Nuk jemi ende atje, gjërat mund të prishën përsëri. Por duket se ka pak më shumë shpresë krahasuar me ditën e djeshme, kur mendoja se mori fund”,- tha Kryeministri i Hollandës, Mark Rutte. Brenda 750 miliardë euro të fondit të rimëkëmbjes, 390 miliardë euro mund të konsiderohen si grante, sipas diplomatëve, një kompromis mes 350 miliardë që ofruan vendet veriore dhe 400 miliardë që u kërkua nga Franca dhe Gjermania. Nuk ka ende qartësi nëse marrëveshja do përfundohet, por kancelari austriak Sebastian Kurz, tha se është i kënaqur me negociatat.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.