BE, vlerësime e paralajmërime: Qeveria mund të ‘lëshojë’ dorën në prag të zgjedhjeve

“Rritja ekonomike po vijon të rimëkëmbet gradualisht, duke marrë shtysë nga shpenzimet konsumatore dhe investimet private.

Politikat lehtësuese monetare, përmirësimi i tregut të punës, si dhe investimet e huaja direkte të fuqishme do të jenë nxitësit kryesor të shpenzimeve konsumatore dhe investimeve të biznesit.

Defiçiti fiskal dhe borxhi publik në raport me Prodhimin e Brendshëm Bruto projektohet të bien, por angazhimi i qeverisë për konsolidim fiskal mund të vihet në provë nga përfundimi i marrëveshjes me FMN, si dhe nga zgjedhjet e ardhshme”, thuhet në raportin e  fundit të Komisionit Europian për ekonominë e Bashkimit europian dhe vendeve kandidate.

Sa i përket projeksioneve, për vitin aktual, Komisioni Europian ruan të njëjtin vlerësim, dhe flet për një rritje pranë 3.5%. Por, për vitin e ardhshëm, krahu ekzekutiv i Bashkimit Europian rishikon ekonominë në territor pozitiv, duke projektuar një rritje pranë 3.6%.

Në raportin e fundit, atë të vendeve kandidate, Komisioni projektonte një rritje ekonomike pranë 3.5%. Sa i përket sektorit bankar, komisioni vlerëson se kreditimi ndaj familjarëve është rritur duke marrë shtysë nga kostot e ulta të financimit, si dhe nga lehtësimi i stadardeve të kreditimit.

Në paragrafin referuar rreziqeve, Komisioni nënvizon: “Rritja e pasigurive politike që lidhen me zgjedhjet parlamentare të qershorit 2017 mund të dëmtojnë konsumin dhe investimet”. Ndër të tjera, institucioni thekson se, reforma në drejtësi mund të përmirësojë ambientin e biznesit si dhe të nxisë potencialin e rritjes ekonomike. Rreziku më i madh për Shqipërinë mbetet konsolidimi fiskal, dhe patjetër që lidhet me zgjedhjet e Qershorit. Qeveria rrezikon të lehtësojë politikat fiskale në prag të zgjedhjeve të qershorit”, paralajmëron Komisioni Europian.

I njëjti paralajmërim erdhi edhe nga Standard and Poor`s në vlerësimin e  fundit të borxhit sovran për Shqipërinë të publikuar në fillim të muajit Shkurt.

Roel Korkuti/RTV SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.