Befason inflacioni në Eurozonë – Bie në 1.5% gjatë marsit, i largohet objektivit të BQE
Inflacioni në Eurozonë është ngadalësuar ndjeshëm gjatë muajit Mars. Të dhënat paraprake të publikuara të Premten nga Eurostat tregojnë se, çmimet e konsumit u rritën gjatë muajit me vetëm 1.5%, krahasuar me të njëjtën periudhë të një viti më parë.
Pritshmëritë ndërkohë flisnin për një normë në 1.8%. Norma e inflacionit ka rënë kështu në 1.5%, nga 2% që regjistrohej në muajin Shkurt, duke iu larguar sërish objektivit të Bankës Qendrore Europiane.
Rezultati nën pritshmëritë gjatë Marsit, vjen kryesisht falë ngadalësimit të papritur të çmimeve në Gjermani dhe Spanjë.
Norma bazë e inflacionit nga ana tjetër, që përjashton produktet me luhatshmëri të lartë, si energjia apo ushqimet e papërpunuara, ra po ashtu gjatë muajit, në 0.7%, nga 0.9% që ishte gjatë Shkurtit. Kjo do të thotë se, rënia e inflacionit gjatë Marsit nuk vjen si pasojë e produkteve të caktuara, por si pasojë e konsumatorit.
Norma bazë e inflacionit ka prekur kështu nivelin më të ulët të 5 muajve të fundit.
Në sektorin e shërbimeve, çmimet u rritën me 1%, nga 1.3% që ishte rritja gjatë Shkurtit. Çmimet e ushqimeve, alkoolit dhe duhanit u rritën me 1.8%, nga 2.5% në Shkurt.
Të dhënat nuk befasojnë aspak Bankën Qendrore Europiane, që ka qenë vazhdimisht skeptike gjatë muajve të fundit mbi ecurinë e çmimeve, dhe pavarësisht arritjes së objektivit ka vendosur të mos ndryshojë programin e stimujve.
Të dhënat i japin të drejtë, duke legjitimuar vendimin e bankës për të vijuar me normat negative të interesit dhe programin e stimujve.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.