BEI pas Brexit – Mund të vazhdojë pa zotërimin e Britanisë prej 9 mld euro

Banka Europiane e Investimeve (BEI) i ka “krahët e ngrohta” për të vazhduar pas Brexit, tha zv/Presidenti i institucionit, duke u treguar optimist ndaj këtij eventi që mund të sjellë humbjen e zotërimit britanik prej rreth 9 miliardë euro. Banka Europiane e Investimeve, e zotëruar nga vendet anëtare të Bashkimit Europian, përdor depozitat e tyre në kapital si siguri për të financuar kredi për hulumtime, infrastrukturë dhe projekte mjedisore në Europë dhe të gjithë botën.

Megjithatë, Brexit pritet të sjellë tërheqjen e zotërimit prej 16% nga Britania,  duke lënë një hendek prej rreth 9 miliardë euro në financa.  Gjatë një interviste,  zv/Presidenti i bankës, Dario Scannapieco tha se kjo nuk do të përbëjë problem. “Ne do të vazhdojmë pa nevojën e kësaj paraje”, tha ai duke shtuar se Brexit nënkupton se Mbretëria e Bashkuar nuk do të ketë më zotërim te Banka Europiane e Investimeve.  Sipas tij,  banka po shqyrton progresin e planeve të lajmëruara në Dhjetor, për një filial të ri të fokusuar vetëm në projektet për vendet jashtë BE, ku shpreson se do të mbajë ende disa prej miliardave të Britanisë pas Brexit.

Një tjetër event me ndikim janë negociatat për Brexit, ku do të përcaktohet marrëdhënia përfundimtare e Britanisë me Bankën Europiane të Investimeve.  Banka investon aktualisht 70-80 miliardë euro në vit, me rreth 10% e kësaj shifre që shpenzohet jashtë Bashkimit Europian. Në vitin 2017, disbursimet totale të bankës ndaj vendeve të Ballkanit Perëndimor si Shqipëria, Bosnja, Kosova, Maqedonia dhe Serbia, qëndruan në 548 milionë euro.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.