“BEI” “zhduket” nga Shqipëria – Institucioni huadhënës i BE nuk jep asnjë fond që prej 2014-ës

Raporti i fundit për Ballkanin Perëndimor i Bankës Europiane të Investimeve tregon se praktikisht ky institucion është zhdukur tërësisht nga Shqipëria tre vitet e kaluar. Nga të dhënat që raporton vetë banka, paratë e fundit në vendin tonë janë financuar në 2014-ën, ndërkohë që në 2015-ën, 2016-ën dhe 2017-ën nuk është dhënë asnjë para. Banka Europiane e Investimeve është institucioni huadhënës zyrtar i Bashkimit Europian dhe që prej vitit 2010 ka rritur ndjeshëm prezencën në Ballkanin Perëndimor.

Aksionerë të bankës janë vetë anëtare të unionit, ndërkohë që institucioni nuk është fitimprurës. Banka financon kryesisht sektorë si, kujdesi shëndetësor, arsimi, ndërmarrjet e vogla dhe të mesme, etj. Përgjatë tre viteve të kaluara, banka ka injektuar në rajon plot 978 milionë euro,  nga të cilat asnjë kacidhe për Shqipëri. Siç duket qartë edhe nga tabela, Shqipëria është  i vetmi vend që nuk ka marrë asnjë para nga institucioni  huadhënës i Bashkimit Europian përgjatë tre viteve të fundit.

Të dhënat i referohen 10 viteve të fundit, dhe tregojnë se Shqipëria është vendi që ka marrë më pak para gjatë kësaj periudhe kohore, madje edhe më pak se Kosova. Për Shqipërinë financimet fiksohen në 148.5 milionë euro, ndërkohë që pjesa e luanit i takon Serbisë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.