Belgjika eksperimenton ‘flluskën korona’ për të lehtësuar kufizimet sociale!

Quhet ndryshe ‘puzzle’ me katër persona. Nëse do të kishit vetëm katër anëtarë të familjes ose miq për të darkuar për disa javë bllokimi prej koronavirusit, kë do të zgjidhnit? Kjo është dilema që qeveria belge u ka dhënë qytetarëve të saj ndërsa po kalon në fazën tjetër të lehtësimit të kufizimeve në jetën e përditshme.

Nga e diela, çdo familje në Belgjikë mund të ftojë deri në katër mysafirë në shtëpinë e tyre. Dy grupe prej katër personash do të formojnë një “flluskë korona”, që do të mund të vizitojnë shtëpitë e njëri-tjetrit. Askush tjetër nuk lejohet të futet në rrethin e brendshëm shoqëror. Koncepti, i cili gjithashtu është duke u diskutuar edhe nga qeveria britanike, hap fushën e minuar më të madhe sociale të bllokimit të koronavirusit.

Kryeministri i Belgjikës, Sophie Wilmès, njoftoi planin javën e kaluar, pasi u akuzua se kishte vendosur prioritet ekonomisë mbi dëshirat e njerëzve për t’u ribashkuar me miqtë dhe familjen. Lejimi i flluskave sociale të Dielën, Ditën e Nënës në Belgjikë dhe në pjesën më të madhe të Europës kontinentale, nuk është rastësi.

“Ndarja fizike nga ata që i duam në disa raste është e padurueshme,” tha Wilmesi, por vizitorëve u thuhet që të mos përqafojnë ose të shkëmbejnë përshëndetjen tipike me tre puthje. Qeveria pret që mysafirët të qëndrojnë 1,5 metra larg dhe sugjeron që njerëzit të takohen në kopshte ose në tarraca kur është e mundur. Autoritetet thonë se është e pamundur për të kontrolluar rregullat, kështu që ata mbështeten në ndjenjën e njerëzve për detyrën qytetare.

Belgët, veçanërisht familjet e mëdha ose ato ku njëri ose të dy prindërit janë rimartuar, tashmë po mendojnë për zgjedhjet e tyre.

Epidemiologët që këshillojnë qeverinë zgjodhën numrin katër sepse përputhet me kapacitetin aktual për të bërë gjurmim kontakti nëse dikush sëmuret. Bashkimi i dy familjeve gjithashtu zvogëlon efektin e shumëzimit të rrezikut që do të vinte nga lejimi i përzierjes më të larmishme, por modelet epidemiologjike nuk përputhen me mënyrën sesi njerëzit shoqërohen në jetën reale.

“Flluska Korona” e Belgjikës është e ngjashme me qasjen gjermane, ku njerëzit nga dy familje të veçanta lejohen të takohen nga kjo fundjavë nën relaksimin e ri të bllokimit të vendit. Vetëm një person për një familje ishte më parë i aftë të takonte një person nga një familje tjetër.(TheGuardian)

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.