BERZH ngre parashikimin e rritjes ekonomike të Shqipërisë për vitin 2017 – Rritja mbi mesataren e rajonit

Banka Europiane për Rindërtim dhe Zhvillim, një nga financuesit më të mëdhenj të vendeve të Europës Juglindore ka modifikuar në rritje parashikimet për të gjithë rajonin ku ajo vepron. Shkak për këto pritshmëri optimiste janë bërë nivelet e larta të eksporteve, një ringjallje në investime dhe çmimet më të qëndrueshme të komoditeteve.

Ndër vendet që kanë marrë një parashikim në rritje është edhe Shqipëria, për të cilën në vitin 2017 BERZH projekton një rritje prej 3.7%. Që nga parashikimi i fundit i muajit Maj, pritshmëritë për zhvillimin ekonomik të Shqipërinë janë ngritur me 0.2 pikë përqindje.

Tashmë, niveli aktual shtrihet në një linjë me parashikimet e Fondit Monetar Ndërkombëtar dhe Komisionin Ndërkombëtar, ndërsa është mbi parashikimin e Bankës Botërore, e cila pret një rritje 3.6%.

Megjithatë të gjithë këto institucione kanë pritshmëri më të ulëta se qeveria shqiptare, sidomos sa i takon pritshmërive për vitin e ardhshëm. BERZH e projekton rritjen ekonomike për vitin 2018 në po 3.7%. Këtu parashikimi “sfidon” atë të qeverisë, e cila pret rritje mbi 4%, deri në 5.5%, për shkak të investimeve të parashikuara në projektbuxhet.

“Aktiviteti ekonomik në Shqipëri vijon të jetë në një trend në përshpejtim. Pas rritjes bazë të 2016-ës në 3.4%, norma e rritjes së PBB lulëzoi mbi 4% nga viti në vit për gjysmën e parë të vitit 2017. Rritja po nxitet nga investimet e forta, kryesisht të lidhura me ndërtimin e gazsjellësit Trans Adriatik, TAP.

Këndvështrimi afatshkurtër mbetet pozitiv dhe prandaj kemi vendosur të ngremë parashikimin për rritjen ekonomike të vitit 2017, bazuar nga performanca e fortë në pjesën e parë të 2017-ës, nga 3.5 në 3.5 për qind, duke qëndruar në atë nivel në vitin 2018, në kurriz të kërkesës së brendshme private dhe punimeve të tjera të pritshme në investime direkte në fushën e energjisë, përfshirë edhe TAP”, shkruan BERZH në relacionin për Shqipërinë.

Sa i takon rajonit të Europës Juglindore, mesatarja e rritjes ekonomike është 3.6%, ku Kosova dhe Mali i Zi presin të njëjtën normë rritjeje sa Shqipëria. Mbretëresha e këtij rajoni duket se është Rumania, e cila po përjeton një periudhë të artë dhe parashikon një rritje të ekonomisë prej 5.3% këtë vit dhe 4.2% vitin e ardhshëm.

Duhet thënë se për vitin 2018, pas Rumanisë, Shqipëria është vendi i dytë me rritjen më të lartë, ndjekur vetëm nga Kosova me 3.5%.

Ekonomitë e tjera europiane që presin rritje ekonomike të konsiderueshme këtë vit janë edhe Letonia me 4.7%, Turqia me 5.1%, si dhe Azia Qendrore me një mesatare rritjeje prej 4.5%.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.