Besimi te bankat – Studimi: Është në nivele mesatare
Besimi i publikut në sistemin bankar shqiptar është në nivele mesatare dhe ka hapësira të mëdha për përmirësim. Shoqata Shqiptare e Bankave prezantoi të hënën gjetjet e studimit për besimin e konsumatorëve te sistemi bankar.
Sipas anketimit, afërsisht një e treta e të intervistuarve është shprehur se ka pasur të paktën njëherë ankesa në marrëdhënien e tyre me bankën. Kryetari i Shoqatës së bankave, Silvio Pedrazzi, tha se kjo është një shifër e lartë dhe që kërkon reflektim nga ana e bankave.
Nëse anketa tregon se një ndër tre klientë ka ankesa, ky nuk është lajm i mirë për bankat. Kjo është një përqindje mjaft e lartë dhe është një problem për të cilin duhet të reflektojmë. Unë i pari jam i vetëdijshëm se në bankën që drejtoj jemi të ngadaltë në përgjigjet për klientët, jemi të ngadaltë në përpunimin e aplikimeve për kredi. Nuk ka rëndësi nëse kemi bërë përmirësime, qoftë edhe domethënëse, krahasuar me periudhat e mëparshme. Çështja është se jemi ende të ngadaltë, u shpreh ai.
Studimi për besimin e konsumatorëve në banka do të ketë edhe një fazë të dytë, rezultatet e të cilës do të publikohen në muajin nëntor.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.