Biden rikthehet në skenë – “Trump ka prishur reputacionin e Amerikës në botë”
Demokrati Joe Biden i quajti politikat e presidentit Donald Trump si ekstreme, në përpjekje për të stabilizuar fushatën e tij, pasi debati i kaluar me garuesit e tjerë demokratë ndikoi negativisht e publiku. Ish zv/Presidenti tha se Trump ka dëmtuar reputacionin e Amerikës. Presidenti republikan ka tronditur aleatët e Washingtonit duke tërhequr Shtetet e Bashkuara nga marrëveshja klimatike e Parisit, marrëveshja bërthamore me Iranin, pakti tregtar me vendet që lagen nga Oqeani Paqësor si dhe ka kërcënuar daljen nga NATO.
Biden, që ka shërbyer në Senatin e Shteteve të Bashkuara për 35 vite, ktheu vëmendjen te Donald Trump, duke u shmangur nga debati me demokratët e tjerë. Biden kritikoi Trump për dorëzimin e rolit drejtues të SHBA në të gjithë botën dhe argumentoi se duhet veprim kolektiv për ndryshimin klimatik, armët bërthamore, terrorizmin dhe luftën kibernetike. Biden tha se si president, do të tërhiqte trupat amerikane nga Afganistani, ndalonte mbështetjen amerikane në ndërhyrjen e Arabisë Saudite në Yemen si dhe të rikonfirmonte angazhimin e vendit në NATO.
Brenda vendit ai do të hiqte barrierat e udhëtimit për myslimanët dhe ndalonte praktikën e ndarjes së familjeve emigrante në kufijtë amerikane me Meksikën. Biden ka kritikuar ashpër tërheqjen e Trump nga marrëveshja bërthamore e Iranit, diçka që ai do të rikthente. Si president, Biden do të rikthente gjithashtu marrëveshjen klimatike të Parisit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.