Bie 18% tregu i shërbimeve postare – Dërgesat ndërkombëtare, ulje mbi 80% në tremujorin III 2020 prej bllokimit të kufijve

Vështirësitë e krijuara prej bllokimit të kufijve kanë ndikuar ndjeshëm shërbimet postare, ndërkohë që kanë qenë dërgesat ndërkombëtare ato që kanë shënuar edhe rënien më të fortë. Në raportin e sapo publikuar, AKEP bën me dije se në në total, Posta Shqiptare bashkë me 23 ofrues të tjerë që operojnë në vend, kanë kryer në tremujorin e tretë të vitit 2020 7.138.977 shërbime postare, me një rënie prej 18% krahasuar me tremujorin e tretë të vitit 2019, kur u regjistruan 8.727.033 shërbime.

Rënien më të fortë e kanë shënuar shërbimet e postës jashtë kufijve e anasjelltas. AKEP raporton se Posta Shqiptare, subjekti që zë peshën më të madhe në treg, ka kryer në tremujorin e tretë të vitit të shkuar 449.011 shërbime ndërkombëtare, me një ulje 87% krahasuar me tremujorin e tretë të vitit 2020 kur numri I tyre ishte 3.388.734. Një rritje të lehtë kanë shënuar në këtë tregues subjektet e tjerë, por pa ndikim në treg, duke qenë se ai dominohet në masën 78% nga Posta Shqiptare.

Gjithsesi, treguesit janë në rritje krahasuar me tremujorin e mëparshëm të vitit 2020, kur masat shtrënguese për shkak të Pandemisë Covid 19 ishin shumë më të ashpra. Posta Shqiptare në tremujorin e tretë 2020 ka realizuar 5,577,108 shërbime postare, shifër e cila përkthehet në 137,186 objekte postare më shumë se tremujori i dytë 2020, sikundër ofruesit e shërbimeve postare në tremujorin e tretë 2020 kanë realizuar 379,703 objekte postare më shumë se në tremujorin e dytë të vitit 2020.

Nga të dhënat e raportuara rezulton se volumin më të madh të objekteve postare e zë shërbimi universal postar me rreth 69.5% ose 4,964,623 objekte postare, ndjekur nga shërbimi ekspres me 16% ose 1,143,480 objekte postare. Shërbimi jo universal zë 14.4% ose 1,030,873 objekte postare.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.