Bie inflacioni në Britani në 2.4% – Vështirëson punën e Bankës së Anglisë në tkurrjen monetare
Inflacioni në Mbretërinë e Bashkuar ra papritmas në muajin Prill, duke shtuar dyshimet mbi kohën kur Banka e Anglisë do të rrisë normën bazë të interesit përsëri.
Të dhënat zyrtare treguan se indeksi i çmimeve të konsumit u ngadalësua në 2.4%, që është niveli më i ulët që prej Mars-it 2017 dhe në rënie nga 2.5% që ishte një muaj më parë. Inflacioni i lartë, i shkaktuar nga rënia e paundit që prej referendumit në vitin 2016, ka tkurrur fuqinë blerëse të konsumatorëve britanikë.
Edhe pse çmimet kanë treguar rënie nga niveli prej 3.1% i arritur në Dhjetor, Banka e Anglisë po monitoron faktorët që pritet të nxisin inflacionin.
Guvernatori Mark Carney përmendi një taksë të re mbi sheqerin te pijet jo-alkoolike si dhe faturat më të mëdha të energjisë elektrike dhe karburantit, ndër arsyet se pse inflacioni do të rritet në mënyrë të përkohshme, përpara se të bjerë.
Zyra e Statistikave në Londër deklaroi se çmimet e pijeve jo-alkoolike janë rritur ndjeshëm në muajt e fundit, por që ndikimi te treguesi final i inflacionit ishte minimal.
Të dhënat e fundit për çmimet në fabrikat britanike, treguan një rritje sipër projeksioneve. Fabrikat kanë rritur çmimet me 2.7% gjatë Prillit. Ndër këto, kosto e lëndëve të para, ku pjesa më e madhe përfshirë naftën importohet, tregoi rritje me 5.3% krahasuar me të njëjtën periudhën një vit më parë.
Projeksioni i fundit i Bankës së Anglisë tregoi se inflacioni do të bjerë në 2.1% në një vit, duke u kthyer më vonë drejt objektivit prej 2%. Kjo sipas institucionit, do të ndodh vetëm nëse norma bazë e interesit do të rritet 3 herë me nga 0.25%.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.