Bie kërkesa botërore për ar – Të gjithë sektorët përveç teknologjisë, tregojnë rënie në tremujorin e dytë
Kërkesa për ar ka rezultuar e dobët në tremujorin e dytë, duke prekur 964.3 ton, ndërsa për gjysmën e parë të vitit, në 1,959.9 ton, që është niveli më i ulët që prej vitit 2009. Blerjet nëpërmjet fondeve të listuara në bursë kanë rënë gjithashtu gjatë kohëve të fundit. Kërkesa për bizhuteri në tremujorin e dytë ra me 2%, në 510.3 ton, kryesisht prej rënies në tregun Indian.
Ritmi i blerjeve nga bankat qendrore u ngadalësua gjithashtu në tremujorin e dytë, me 7%. Kërkesa për monedha dhe shufra ishte e pandryshuar. Kërkesa nga teknologjia ofroi pak mbështetje, duke u rritur me 2% në nivelin më të lartë në 3 vite.
Blerjet në fondet e listuara në bursë treguan rënie me 46% me bazë vjetore. Fondet e listuara në Europë patën fluks hyrës, prej pasigurisë në lidhje me zgjedhjet italiane dhe perspektivës për politikat monetare.
Megjithatë, zotërimet në fondet e listuara në Amerikën e Veriut ranë me 30.6 tonë, ndërkohë që investitorët janë përqendruar në fuqizimin ekonomik. Investitorët e blejnë zakonisht metalin e çmuar në periudha të pasigurive.
Në sektorin e teknologjisë, ka patur rritje për të 7-in tremujor radhazi. Ari i përdorur në pajisje elektronike vazhdon të rritet, për shkak të kërkesës së madhe për smartphona pajisjeve elektronike në automjete.
Bankat Qendrore kanë shtuar 89.4 tonë ar në rezervat zyrtare globale në tremujorin e dytë të këtij viti, në rënie me 7% me bazë vjetore.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.