Bie kërkesa për kredi – BSH: Në T1 2021 pritet të rritet kërkesa nga individët

Banka e Shqipërisë ka publikuar vrojtimin e aktivitetit kreditues për tremujorin e katërt 2020. Bazuar në perceptimet e bankave tregtare, standardet e kreditimit për bizneset u shtrënguan gjatë tre muajve të fundit të vitit të kaluar. Bankat shtrënguan dhe kushtet e termat e kreditimit për kreditë e reja akorduar bizneseve.

Kërkesa  për  kredi  e bizneseve u vlerësua më e ulët në tremujorin e katërt të vitit 2020, në sajë të rënies së kërkesës për kredi për financimin e investimeve dhe për kreditë disbursuar bizneseve të vogla e të mesme. Kushtet më të përkeqësuara të ofertës për kredi, si edhe mungesa e kërkesës për kredi nga ana e bizneseve kanë pasur si faktor të përbashkët perceptimin për rrezikun lidhur me situatën aktuale ekonomike e perspektivën për të.

“Për tremujorin e pare të vitit 2021, standardet e kreditimit për bizneset priten të mbeten të pandryshuara. Standarde të njëjta kreditimi, bankat presin që t’i aplikojnë mbi kreditë dhënë bizneseve të mëdha, si edhe në kreditë për  financimin  e  investimeve. Për  bizneset  e  vogla  e  të  mesme, bankat presin që t’i shtrëngojnë  disi  standardet,  ndërkohë  që  për  kreditë  për  mbulimin  e  nevojave  për  likuiditete  t’i lehtësojnë disi”.

Ndërkohë, bankat vlerësuan një tablo disi më ndryshe në kreditë për individët gjatë tremujorit të fundit të vitit. Kështu,  standardet  e  kreditimit dhe  termat  e  përgjithshme  të  kreditimit  për  individët  u  lehtësuan  në tremujorin  e  katërt.  Sipas  gjykimit  të  bankave, kërkesa  për  kredi  ishte  më  e  ulët  në  këtë  tremujor, kryesisht si pasojë e pakësimit të kërkesës për kredi për financimin e konsumit. “Në tremujorin e parë të vitit 2021, bankat presin kërkesë disi të shtuar për kredi nga ana e individëve, më e përqendruar në segmentin e kredisë konsumatore”.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.