Bie papunësia në Kinë – Treguesi zyrtar shënon 3.97% në zonat urbane, priten vështirësi
Norma e papunësisë në zonat urbane në Kinë ra poshtë 4%-shit për të parën herë që prej vitit 2001, duke treguar se ngadalësimi i vrullit ekonomik që nisi në vitin 2015 nuk po reflektohet në tregun e punës.
Të dhënat zyrtare tregojnë se 3.34 milionë vende të reja pune janë krijuar në tremujorin e parë 2017. Norma e papunësisë në zonat urbane ishte 3.97% në përfundim të tremujorit.
Kina e ka mbajtur punësimin në nivel të qëndrueshëm pavarësisht ngadalësimit të ekonomisë dhe shkurtimeve në industritë me mbikapacitet.
Analistët thonë se treguesi zyrtar nuk është një matës i besueshëm të kushteve të punësimit në vend. Sipas zyrës së Statistikave, hera e fundit që regjistrohej një normë e tillë ishte në vitin 2001.
Në vitin 2016, norma e papunësisë qëndronte në 4.02%, ndërsa nga viti 2010 në 2015-ën, nuk ka lëvizur nga 4.1%-shi.
Lidershipi në Kinë ka mbrojtur rritjen e punësimit edhe pse ekonomia po hyn në një normale të re të rritjes së ngadaltë. Kryeministri Li Keqiang tha në muajin Mars se Kina shtoi 13.14 milionë vende të reja pune në 2016-ën dhe synon për 11 milionë këtë vit, duke e mbajtur normën poshtë 4.5%-shit.
Objektivi duket i sigurt ndërkohë që norma zyrtare e papunësisë në Kinë, që përfshin vetëm zonat urbane dhe rezidentët e regjistruar dhe përjashton zonat rurale e emigrantët, ka kaluar 4.5%-shin vetëm në vitin 1980.
Disa sektorë nga ana tjetër, po paraqesin sfida. Analistët thonë se vendi duhet të rivendosë rreth gjysmë milionë punonjës që do të humbin vendet e punës në fabrikat e qymyrit dhe çelikut këtë vit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.