Bie papunësia në Spanjë – Në 17.2%, firmat e shërbimit rritin ndjeshëm punësimin
Norma e papunësisë në Spanjë ra në nivelin më të ulët që prej fundit të 2008-ës në tremujorin e dytë, duke thyer projeksionet e analistëve, ndërkohë që firmat e sektorit të shërbimit në zonat turistike kanë rritur ndjeshëm punësimin për muajit e verës.
Megjithatë, katër vite kanë kaluar pasi Spanja doli nga recesioni dhe norma e papunësisë në vend është ende e dyta më e madhe në Europë, pas Greqisë. Sipas zyrës së Statistikave në vend, papunësia ra në 17.2% në tremujorin e dytë. Papunësia ka rënë gradualisht dhe ritmi i krijimit të vendeve të punës ka kaluar pritshmëritë deri më tani për 2017-ën, pavarësisht shqetësimeve mbi varësinë e madhe në vendet e përkohshme të punës.
Sipas projeksioneve të Qeverisë, ekonomia spanjolle pritet të zgjerohet me 3% në 2017-ën, në rritje me vlerësimet e mëparshme prej 2.7%. Tremujori i dytë ka qenë tradicionalisht pozitiv për tregun e punës në Spanjë, ndërkohë që resortet, hotelet dhe restorantet punësojnë staf shtesë përpara sezonit më të ngarkuar të vitit, zakonisht me kontrata afat-shkurtër.
Megjithatë, kompanitë në sektorët industrialë dhe të ndërtimit kanë kontribuar gjithashtu në rritjen e vendeve të punës. Rënie e punësimit është regjistruar në Bujqësi. Numri i personave të papunë ka rënë poshtë nivelit prej 4 milionë njësi për të parën herë që prej vitit 2008, duke prekur 3.9 milionë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.