Bie prodhimi në SHBA – Industria në territor negativ, si pasojë e automjeteve
Prodhimi industrial në Shtetet e Bashkuara të Amerikës ra lehtë gjatë muajit Maj si pasojë e rënies së prodhimit në manifakturë, tregojnë të dhënat më të fundit nga ekonomia më e madhe e botës. Kështu, në tërësi prodhimi industrial ra me 0.1% muajin e kaluar, ndërkohë që të dhënat e muajit Prill u rishikuan në rritje, në 0.9%.
Të dhënat e Majit ndërkohë rezultojnë të jenë nën pritshmëritë e tregjeve dhe analistëve që flisnin për një normë rritje pranë 0.2%. Sa i përket manifakturës ndërkohë, rënia fiksohet në 0.7% gjatë Majit. Kjo është rënia më e madhe mujore që prej Janarit të vitit 2014. Brenda sektorit, rënien më të madhe, me 6.5% e ka pësuar sektori i prodhimit të automjeteve dhe me 2% ndërkohë ka rënë prodhimi i metaleve.
Prodhimi në sektorin minerar ndërkohë regjistrohet në një rritje të ndjeshme, prej 1.8%. Të dhënat e fundit të Rezervës Federale tregojnë kështu se, përqindja e kapacitetit industrial në përdorim ka rënë me 0.2 pikë përqindje, në 77.9%. Rezerva Federale e vlerëson kapacitetin e sektorit si një tregues i saktë i rritjes së inflacionit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.