Bie qeveria në Rumani, largohet kryeministri i dytë në 7 muaj pas debatit me kreun e partisë
Rumania ka humbur kryeministrin e saj të dytë në 7 muaj, pas tërheqjes së mbështetjes për Mihai Tudose nga vetë partia e tij politike. Kryeministri Socialdemokrat tha se do të dorëhiqet me kokën lart.
“Nuk doja ta prishja partinë. Ata më emëruar dhe ata më hoqën. Unë marr përgjegjësi për veprimet e mia dhe nuk pendohem për asgjë”, tha Tudose.
Dorëheqja vjen pas debatit me kryetarin e partisë, Liviu Dragnea, i cili nuk ishte dakord me planet për riformatimin e kabinetit dhe dëshirën e kryeministrit për zëvendësimin e ministrit të brendshëm për shkak të një skandali brenda policisë për abuzimin e një fëmije.
Dragnea vetë nuk mund të marrë postin për shkak të një dënimi kriminal, por kërkon të shprehë në këtë mënyrë pushtetin e tij.
Rumania nuk njihet për qëndrueshmëri në qeverisje, pasi ka patur 14 kryeministra që nga viti 1990 për shkak të mungesës së stabilitetit në politikë.
Kryeministri i ri do të marrë përsipër një ekonomi që u rrit mbi 8.8% në terma vjetorë gjatë tremujorit të tretë, edhe pse Banka Qendrore dhe Komisioni Europian kanë paralajmëruar mbi dobësitë e buxhetit nga shkurtimi i taksave bërë nga socialdemokratët si edhe nga rritja e pagave në sektorin publik.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.