Bien kreditë me probleme – Prekin nivelin më të ulët që nga korriku 2011

Niveli i kredive me probleme për muajin shkurt të këtij viti zbriti më tej në 18%, duke prekur nivelin më të ulët që nga korriku i vitit 2011.

Guvernatori i Bankës së Shqipërisë, Gent Sejko tha se rënia e nivelit të kredive me probleme është një sinjal pozitiv në drejtim të rritjes së kreditimit, sidomos në segmentin e biznesit, ku ende bankat vazhdojnë të tregohen mjaft konservatore në huadhënie.

Sipas Guvernatorit, zhvillimet e kreditimit, sidomos në monedhën vendase, janë mjaft inkurajuese. Në konferencën për shtyp pas mbledhjes së Këshillit Mbikëqyrës, Guvernatori Sejko shprehu një optimizëm në rritje lidhur me performancën e ekonomisë shqiptare në këtë fillim viti.

Sipas tij, burimet e rritjes janë forcuar me përmirësimin e kërkesës së jashtme, ndërkohë që kërkesa e brendshme po vazhdon rimëkëmbjen e qëndrueshme. Këshilli Mbikëqyrës vendosi të mërkurën të mbajë të pandryshuar normën bazë të interesit, në nivelin 1.25%.

Banka e Shqipërisë përsëriti edhe njëherë apelin për forcimin e reformave strukturore, si parakusht për garantimin e rritjes ekonomike afatgjatë të vendit.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.